Phili 4 | WSK | STEP | Umutang ko, aga singsang yawara, nina uwutata Kari Biya te sokel ago sanamaralko! Ani ninga kuesam, ale ningarkikko angamang biyala aniso. Nina aninga ura ko nunguning, se ani nego ko ninguru amilmilasam.

Philippians 4

Ana lila te yawarakala baganakko

1 Umutang ko, aga singsang yawara, nina uwutata Kari Biya te sokel ago sanamaralko! Ani ninga kuesam, ale ningarkikko angamang biyala aniso. Nina aninga ura ko nunguning, se ani nego ko ninguru amilmilasam.

2 Imet ilagala Euodia Syntyche ilak, ani ninga manorsam, nina Kari Biya Jesus te ninimi nengemang suwan awural ale bagaralko. 3 Se aga bo yawara Syzygus, ni imet ilagala umutang nunga sangaruko ani ka manorsam. Mu awuk, nuna den gilalong yawara ko ani agarak ura ilu lagaman, se Clement se aga ura suwan saki agotala. Kariimet imitang marak tom suen biya bagomonko se, nunga nunup Kaem koma te aniso.

4 Tom suen biya Kari Biya te amilmil ago la bagaralko. Se aking balsam, amilmil ago la bagaralko! 5 Ale pempem munan lila yawara te ninga saki arungu bagaralko. Kari Biya tairukko tom pingi aram. 6 Nina anapeya ko ikia me ninga morukko. Mena. Ikup se mel suen biya mu ko Kaem ngatongal ale amilmil tualko. 7 Ale Jesus Kristus ilukuawuralko. Umutang te Kaem ko lila yawara, ana iki kutuwunakko me terong, mu ningaruk se, nenenga ikia, ninga nengemang lila awurokko.

8 Se aga singsang, den nukum te mu iwita balsam: Nina anapeya ningo nuam, anapeya yawarakala se diram, anapeya nunguningta, anapeya nikitang nunguning, mu la ninga ikia, ninga nengemang te ko ikialko. 9 Ale mel aninga agiring te ikiman, ale aninga namara taira te beterem se aringiman, umutang te diram beteralko. Se Kaem, lila yawara ko duap, mu nengerak bagurukko.

Paul Philippi nunga munan mel kote beteman mu ko amilmilakaso

10 Nina tom maiya nuam namaram se aking ago ko ikia taman ale aga sangorman mu ko ani Kari Biya ko ninguru amilmilasam. Nunguningta nina ani ago ko ningamin tugukasan, bare lage mena. 11 Ani melmasak ko tukunang asam ma me balsam. Mena. Mu awuk, munan aguwaya ani angimik te aratoso, bare ani me ko balsam, am amilmil ago bagasam, munan umutang ani ninguru ikiem. 12 Ani angimik mel mena bagirikko terong mam, aking angimik mel karogo bagirikko terong mam tala. Ani na biyala naik agi na mena agi, ali mel suen biya ago bagirik agi melmasak mena ago bagirik agi, se sor apareyate tom aguwaya, bare ani am amilmil ago bagirikko munan mu ani ninguru ko ikiem. 13 Kari sokel aisuwoso mu ko sokel te ani mel suen biya am bitirikko.

14 Bare nina munan ningo beteman ale ani ikup gikasam mu te aga sangorman. 15 Nina Philippi kariimet nengeta ikisan, tom ani den gilalong yawara ninga manem ale ninga sor Macedonia beterem ale taikasam, mu sor saki ko Kris alo ani me aga sangarukasan, nengeta diram aninga sangarukasan. 16 Se tom ani Thessalonica wonong te bagakasam, mu nina tom ilagala aga sangorman.

17 Ani den imi balsam mu nina aga saongalko me balsam. Mena. Bare ani ko amilmilasam mu iwita, nenenga munan sumu ko koma yawara talko. 18 Ani melmasak terong la ago bagasam, se saki ningurutala am aniso. Mu awuk, nina nigiting munan bolala awuman ale Epaphroditus tuman se ago tairam mu giem ale ani terong maem. Ninga nigiting munan beteman mu Kaem ko amilmiloso. Mu mel Kaem tama te bita tusan se siring yawara aratoso wore turan. 19 Se aninga Kaem mel ningo ningo Jesus Kristus kote aniso se nina anapeya ko tukunang asan mu ningarukko.

20 Se anananga Nainet Kaem tom suen biyala ko nup patawu se laganakko! Nunguning.

Den nukum

21 Nina aninga amilmil den Jesus Kristus ko kariimet suen la nungaralko. Se nanga singsang ani agarak imi te bagasan mu nononga amilmil den ningarsan. 22 Se Kris alo suen la imi te nononga amilmil den karogo la ningarsan. Bare Kris saki Caesar ko kawam te ura iluwasan mu nunga amilmil den ningarikko ninguru sail tagisan se ningarsam.

23 Se nanga Biya Jesus Kristus ko gomang lila nina suen la nengerak bagurukko.